Türkmenbaşy jins toplumy

Hökümet mejlisinde Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew «Balkan» gämi gurluşyk we abatlaýyş zawodynyň maddy-enjamlaýyn binýadyny berkitmek boýunça alnyp barylýan işler barada hasabat berdi. Hasabatda bellenilişi ýaly, häzirki wagtda gury ýük gämileriniň ýokary depginde alnyp barylýan gurluşygy netijesinde bu ugurda ýerli hünärmenler taýýarlanylyp, zawodda dünýäniň iň döwrebap tehnologiýalary ornaşdyrylýar we zawodyň awtomatlaşdyrylan enjamlary işe girizilýär. Şeýle-de zawodyň has netijeli işlemegi üçin onuň maddy-enjamlaýyn binýadyny mundan beýläk-de döwrebaplaşdyrmak, bu ýerde täze enjamlary öndürmek zerur bolup durýar. Şunuň bilen baglylykda, döwlet Baştutanynyň garamagyna degişli teklipler hödürlenildi.

Prezident Serdar Berdimuhamedow hasabaty diňläp, ýurtda gury ýük gämileriniň gurluşygyna badalga berilmeginiň milli senagatyň täze ugruny ösdürmekde möhüm ädim bolandygyny aýtdy. "Munuň özi ýükleriň möçberini yzygiderli artdyrmaga, Türkmenbaşy Halkara deňiz portunyň işini kämilleşdirmäge itergi berýär. Şunda «Balkan» gämi gurluşyk we abatlaýyş zawodyna hem aýratyn orun degişlidir" diýip, döwlet Baştutany belledi.

Prezident Serdar Berdimuhamedow bu döwrebap zawodyň maddy-enjamlaýyn binýadyny berkitmek boýunça taýýarlanan teklipleri goldap, agentligiň ýolbaşçysyna bu ugurda degişli işleri geçirmegi tabşyrdy.

Hökümet mejlisinde wise-premýer H.Geldimyradow milli manadyň dolanyşyga girizilmeginiň 31 ýyllygy mynasybetli Türkmenistanyň Merkezi banky tarapyndan şu ýylyň 1-nji noýabrynda “Türkmen manady — ýurdumyzyň durnukly ösüşiniň nyşany” atly ylmy-amaly maslahaty geçirmäge taýýarlyk görlüşi barada hasabat berdi. Bu barada TDH ýazýar.

Hasabatda bellenilişi ýaly, maslahatyň gün tertibine türkmen milli manadynyň dolanyşyga girizilmegi netijesinde ýurduň gazanan ykdysady üstünlikleri, milli pul-karz syýasatynyň durmuşa geçirilişi, sanly tehnologiýalary ornaşdyrmak arkaly döwrebap bank hyzmatlaryny hödürlemek, elektron tölegler ulgamyny kämilleşdirmek, halkara maliýe guramalary bilen hyzmatdaşlyk etmek bilen baglanyşykly meseleler giriziler. Foruma ugurdaş ministrlikleriň, pudaklaýyn dolandyryş we bank edaralarynyň, ýokary we ýörite orta okuw mekdepleriniň wekilleri gatnaşarlar.

Döwlet Baştutany hasabaty diňläp, wise-premýere milli manadyň dolanyşyga girizilmeginiň 31 ýyllygyna bagyşlanan ylmy-amaly maslahata gowy taýýarlyk görmegi we ony ýokary derejede guramaçylykly geçirmegi tabşyrdy.

Şu ýylyň 20-21-nji noýabrynda Lebap welaýatynyň Türkmenabat şäherinde özbek harytlarynyň milli sergisini we ilkinji türkmen-özbek sebitara forumyny geçirmek meýilleşdirilýär. "Watan" habarar gepleşiginde habar berlişi ýaly, şu gün --- 25-nji oktýabrda sanly ulgam arkaly geçirilen Hökümet mejlisinde wise-premýer B.Atdaýew bu baradaky degişli teklibi döwlet Baştutanynyň garamagyna hödürledi. Şeýle hem ol goňşy ýurtlar bilen söwda-ykdysady gatnaşyklary ösdürmek boýuna durmuşa geçirilýän çäreler barada hasabat berdi. Hasabatda şu ýylyň iýulynda Daşkent şäherinde-de “Türkmenistanda öndürilen” atly ýurduň milli önümleriniň sergisiniň üstünlikli geçirilendigi aýdylyp geçildi.

Prezident Serdar Berdimuhamedow hasabaty diňläp, hödürlenen teklibi makullady we wise-premýere Lebap welaýatynyň Türkmenabat şäherinde özbek harytlarynyň milli sergisini hem-de ilkinji türkmen-özbek sebitara forumyny ýokary derejede guramagy tabşyrdy.